非禮之後（下）
上集：https://bit.ly/3j9776l
然後，琳琳開始帶頭杯葛我。
琳琳比我可愛，比我受歡迎，加上佢嘅說法比我可信，大家都企喺佢嗰邊。
惡夢，每晚都纏繞住我，甚至一晚比一晚更清晰、更強烈、更噁心。
呢個時候，我識到一個叫阿武嘅男仔。
阿武係隔離Band 3學校嘅學生，梳住不羈嘅髮型，完全係一副標準嘅壞學生模樣。
但阿武好快成為咗我嘅男朋友，因為佢講咗一句說話：「我信你，嗰個林姨係賤人！」
我熱淚盈眶。
阿武義憤填膺：「個個都唔信你，我就幫你搵證據。」
我嚇一跳：「吓，都過咗幾年，仲邊度有證據？」
「大家唔信你，因為林姨係女人，而且同男人結咗婚。」阿武眼珠一轉：「如果證明到，佢有鍾意細路女嘅癖好，咁就搞掂。」
我唔太有信心：「林姨真係鍾意細路女？但佢冇非禮過其他人。」
阿武解釋：「嗰次佢非禮你，可能係一時衝動，但佢心底一定有呢種癖好。正如我唔鍾意男人，就算我有機會，我都唔會非禮男人。」
趁林姨屋企冇人，阿武開咗佢嘅門鎖，阿武嘿嘿一笑：「我有個好兄弟，屋企做賊㗎，佢教過我開鎖。」
嗰一刻，我覺得阿武真係世界上最勁嘅男人，有勇有謀。
然後，我拎走咗林姨部電腦，阿武話電腦裡面一定有記錄，例如林姨睇開有關細路女嘅影片。
但電腦裡面有好多個資料夾，我拎走部電腦，仲未睇晒所有資料夾，就俾人拉咗。
我同阿武，一齊被拘捕。
兩個十四歲嘅少年，以為識開鎖就係有勇有謀，其實留低咗無數個破綻，林姨一報警，我哋無所遁形。
阿媽又嬲又傷心：「好好地，做咩要做賊？你要坐監啦。」
估唔到，林姨冇怪我哋，仲上下奔走，表達佢願意原諒我哋。
我哋係初犯，兼且有林姨嘅原諒，所以警誡後就被放走。
阿媽話：「你要多謝林姨啦，如果唔係佢，你分分鐘要入女童院。」
阿武神情複雜：「估唔到，林姨係好人。」
連阿武都認為佢係好人，我嘅最後一片淨土，天崩地裂。
至於林姨嘅電腦到底有冇證據？我永遠唔會知。
自此之後，阿媽又開始同林姨聯絡，有時我會發現阿媽偷偷打電話。
但我只可以睜一隻眼閉一隻眼，因為林姨放過我，令我唔駛入女童院。
中學畢業後，我以為我可以脫離林姨嘅陰影。
但我阿媽患上肝癌，急需捐肝，世事就係咁諷刺，林姨個肝居然適合，佢亦願意捐肝。
我想問，林姨肯捐肝畀個朋友，係唔係佢對我有愧於心？
但我唔敢出聲，我怕佢反悔唔捐，我怕阿媽俾我害死。
捐肝手術好順利，從此，林姨就變成我屋企嘅大恩人。
佢同阿媽做番好朋友，仲成日喺我屋企出入。
我無數次想問阿媽，仲記唔記得林姨對我做過乜嘢。
但我冇問到，因為我怕阿媽答：「林姨咁好人，連我條命都係佢救，點會做啲咁嘅嘢？」
我就咁樣，忍受林姨，忍受我嘅惡夢。
好多年後，林姨病入膏肓，阿媽帶我去探佢。
林姨同我講：「對唔住，當年我真係對你……做咗錯事。」
我呆咗，咁多年嚟，實在有太多人講過「林姨係好人」，搞到連我都懷疑自己，懷疑當年嘅事只係我嘅幻覺。
林姨終於認錯，我望向阿媽，但林姨問：「你可唔可以原諒我？」
我正想話「唔可以」，但阿媽死死捉住我隻手，用一種堅定而期待嘅目光望住我。
阿媽冇出聲，但我知道佢想講乜嘢：「都咁多年啦，原諒佢啦。佢咁好人，佢始終救咗我條命……」
我已經係成年人，唔再係十歲細路，我識得權衡輕重。
我俾人摸一摸，點會緊要得過我阿媽條命？咁計法，林姨對我哋都係恩大於仇。
所以我只可以用盡全身力氣，講一句：「我原諒你。」
不過，我永遠都唔會原諒自己，講咗呢句說話。
大家都話林姨係好人，佢一世人可能只對我做過壞事。
其實，有時連我都覺得佢係好人。
但如果林姨係好人，咁係咪即係話，我先係壞人？
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #非禮之後
Search